Baaise leerders kry rekenaarlesse - Roslyn Baadjies, Die Burger

By die Laerskool Walmer-Wes in die Baai ontvang 400 leerders, waarvan 60 inwoners is van die MTR Smit Kinderhuis, rekenaaropleiding in hul splinternuwe rekenaarsentrum met sy 20 rekenaars.

Rekenaaropleiding vir drie onderwysers is deur 'n borgskap van Knowledge Network in Johannesburg moontlik gemaak op grond van die skool se betrokkenheid by die Kinderhuis.

Volgens die skoolhoof, mnr. Johan Oosthuizen, beteken die borgskap van Knowledge Network baie vir die skool en word die hele gemeenskap deur die rekenaaropleiding bevoordeel. "By Walmer-Wes is daar geen bevoordeling ten opsigte van rekenaaronderrig nie. Die onderrig begin reeds in gr.1. Kinders van die kinderhuis, wat van skoolgelde vrygestel word, word ook nie uitgesluit nie," het hy gesê. 

Volgens Knowledge Network sal Graad 7-leerders met die program dieselfde kwalifikasie hê as iemand wat oor 'n naskoolse rekenaar kwalifikasie beskik. Die gevaar bestaan dat rekenaarvaardige laerskoolleerders 'n uitdaging stel aan hoër skole, omdat laasgenoemde dalk nie vir die goed toegeruste leerders gereed gaan wees nie. Oosthuizen het gesê geen bydrae daarvoor van die Oos-Kaapse onderwysdepartement ontvang word nie.